“Revolucioni i Flamingove” në Shqipëri ka fituar një nga mbështetëset më të njohura ndërkombëtare. Ylli i muzikës pop, Dua Lipa, me origjinë shqiptare nga Kosova, ka shprehur publikisht vlerësimin e saj për protestat që po zhvillohen kundër një projekti të madh turistik në zonën e Zvërnecit.

Protestuesit kundërshtojnë një investim me vlerë rreth 1.6 miliardë euro, të lidhur me Jared Kushner, dhëndrin e presidentit amerikan Donald Trump, si edhe me investitorë të tjerë të huaj dhe vendas. Nga sa raportohet, paratë do të hidhen nga financues të botës arabe. Qeveria e Ramës thotë se investimi është 4 miliardë euro.

Ndërhyrja e këngëtares 30-vjeçare ka rikthyer në vëmendje shqetësimet për dëmtimin e zonave të mbrojtura, mungesën e transparencës dhe anashkalimin e konsultimit publik.

Gjatë një bisede me akademiken dhe shkrimtaren shqiptare Lea Ypi, në podcastin “Service95 Book Club”, Dua Lipa mbajti një qëndrim të qartë për këtë çështje.

“Ajo që më shqetëson është fakti se qeveria mund të ndryshojë ligjin për të hequr mbrojtjen mjedisore, pa zhvilluar asnjë konsultim publik”, deklaroi këngëtarja.

Ajo i cilësoi protestat e qytetarëve si një “burim frymëzimi”, duke theksuar se është emocionuese të shohësh njerëzit që kujdesen kaq shumë për vendin dhe mjedisin e tyre.

Sipas Dua Lipës, çdo projekt zhvillimi duhet të zbatohet përmes një modeli që gëzon mbështetjen e popullsisë dhe respekton procedurat demokratike.

Si nisi “Revolucioni i Flamingove”

Protestat nisën pas planeve për ndërtimin e një kompleksi të madh turistik në Zvërnec, një zonë me rëndësi të veçantë natyrore dhe mjedisore.

Banorët kundërshtuan rrethimin e një plazhi publik brenda zonës së mbrojtur. Pamjet e punonjësve të sigurisë private duke larguar me forcë një banor, ndërsa policia qëndronte në vendngjarje, shkaktuan reagime të forta në opinionin publik.

Protesta lokale u zgjerua më pas në qytete të ndryshme të vendit, me pjesëmarrje të lartë të të rinjve, duke u shndërruar në një lëvizje kundër projektit dhe qeverisë së drejtuar nga Edi Rama. Protesta sot ishte në ditën e 45-të.

Simbol i protestuesve u bë flamingoja, shpendi që jeton në zonat ligatinore shqiptare dhe habitati i të cilit, sipas aktivistëve, rrezikohet nga ndërtimet e planifikuara.

Me kalimin e kohës, protesta mori përmasa më të gjera, duke u kthyer në një lëvizje kundër mungesës së transparencës dhe marrëveshjeve që, sipas organizatorëve, cenojnë pronën publike dhe zonat natyrore.

“Zëri ynë”

Qëndrimi i Dua Lipës u prit me entuziazëm nga protestuesit dhe aktivistët mjedisorë në Shqipëri.

Aleksandër Trajçe, drejtues i organizatës mjedisore PPNEA, deklaroi se fjalët e këngëtares erdhën në momentin e duhur dhe përbëjnë një burim frymëzimi, veçanërisht për të rinjtë që e konsiderojnë atë një figurë përfaqësuese.

Ai shtoi se, përballë presionit të vazhdueshëm të protestave, autoritetet kanë nisur të kryejnë studime për ndikimin mjedisor, megjithëse aktivistët pretendojnë se dëmet në zonën e Zvërnecit kanë filluar tashmë.