Një ngjarje tragjike është regjistruar në zonën e Pireut, në Athinë, ku një 27-vjeçare dhe një 28-vjeçar janë gjetur të pajetë brenda një automjeti të parkuar në garazhin e një banese.

Dy të rinjtë u zbuluan nga babai i 28-vjeçarit, i cili njoftoi menjëherë shërbimet e emergjencës dhe policinë.

Sipas hetimeve paraprake, në trupat e viktimave nuk janë konstatuar shenja dhune, ndërsa autoritetet greke po hetojnë si pistë kryesore helmimin nga monoksidi i karbonit ose gazrat e shkarkimit të automjetit.

Dyshohet se makina kishte motorin dhe sistemin e kondicionimit të ndezur, ndërsa ndodhej në një garazh të mbyllur. Sipas ekspertëve, gazrat e shkarkimit mund të kenë depërtuar në kabinën e automjetit përmes sistemit të ajrimit, duke bërë që dy të rinjtë të humbnin ndjenjat me pasoja fatale.

Shkaku i saktë i vdekjes do të përcaktohet pas autopsisë mjeko-ligjore, ndërsa Policia greke vijon hetimet për të zbardhur plotësisht rrethanat e ngjarjes.