Vlorë, 14 korrik 2026 – Dy drejtues mjetesh lundruese janë ndëshkuar me masa administrative nga autoritetet në Vlorë, pasi u konstatuan duke lundruar në afërsi të brigjeve të detit, duke rrezikuar sigurinë e pushuesve dhe pa dokumentacionin e nevojshëm në bord.

Sipas Policisë, rastet janë evidentuar në zonat Potam dhe "Plazhi i Hidrovorit", ku dy gomone janë bllokuar, ndërsa drejtuesit e tyre janë gjobitur për shkeljet e konstatuara.

Drejtuesi i mjetit lundrues të ndaluar në zonën e Potamit, shtetasi me iniciale H. L., është gjobitur me 500 mijë lekë. Policia bën të ditur se mjeti u lokalizua më pas në plazhin e Drimadhes dhe u sekuestrua.

Ndërkohë, gjatë kontrolleve përgjatë vijës bregdetare të qarkut Vlorë, një tjetër gomone u konstatua duke lundruar pranë bregut në zonën e quajtur "Plazhi i Hidrovorit". Drejtuesi i saj, shtetasi me iniciale E. Sh., u gjobit me 510 mijë lekë, ndërsa nga verifikimet rezultoi se nuk dispononte në bord dokumentacionin e kërkuar ligjor.

Policia e Shtetit deklaroi se kontrollet dhe patrullimet detare do të vijojnë në të gjithë hapësirën detare të qarkut Vlorë, me qëllim garantimin e sigurisë së pushuesve dhe parandalimin e shkeljeve ligjore.

Autoritetet u bëjnë thirrje qytetarëve dhe pushuesve të denoncojnë çdo rast që cenon sigurinë detare dhe publike, duke garantuar reagim të menjëhershëm në përputhje me ligjin.