Pejë, 14 korrik 2026 – Gjykata Themelore e Pejës ka shpallur vendimin ndaj ish-infermieres Aurona Pelaj, e cila u bë e njohur në vitin 2022 pas publikimit të një videoje ku shfaqej duke ushtruar dhunë ndaj të moshuarës Minire Nura në shtëpinë e të moshuarve “Orenda”.

Sipas aktgjykimit, Pelaj është dënuar me 2 vjet e 3 muaj burgim. Në këtë dënim do të llogaritet edhe periudha e paraburgimit, nga 2 nëntori deri më 24 nëntor 2022, ndërsa pjesa e mbetur e dënimit do të ekzekutohet pasi vendimi të marrë formë të prerë.

Gjykata ka vendosur gjithashtu t’i ndalojë Aurona Pelajt ushtrimin e profesionit të infermieres për një periudhë prej pesë vitesh.

Ndërkohë, e pandehura tjetër, Altina Rexhepi, e cila shfaqej në videon virale duke mbajtur duart e të moshuarës gjatë incidentit, është shpallur e pafajshme dhe është liruar nga akuza.

Rasti shkaktoi reagime të forta në opinionin publik në Kosovë dhe më gjerë, pas publikimit të pamjeve që dokumentonin dhunën ndaj Minire Nurës.

E moshuara Minire Nura ndërroi jetë më 31 maj 2024. Lajmi u konfirmua në atë kohë nga avokati i saj, i cili deklaroi: "Po, mund të konfirmoj se ka ndërruar jetë", pa dhënë detaje të mëtejshme mbi shkaqet e vdekjes.