Një vatër zjarri është regjistruar mëngjesin e së martës në kodrat pranë lagjes “15 Tetori” në Vlorë, duke përfshirë një sipërfaqe me pisha dhe shkurre pranë zonës së banuar.

Sipas informacioneve paraprake, flakët janë favorizuar nga era, e cila ka ndikuar në përhapjen e shpejtë të zjarrit dhe ka rritur rrezikun për zgjerimin e vatrës.

Në vendngjarje kanë ndërhyrë forcat e shërbimit zjarrfikës, të cilat po punojnë për izolimin dhe shuarjen e flakëve, me qëllim parandalimin e përhapjes së tyre drejt banesave dhe sipërfaqeve të tjera.

Lidhur me shkakun e zjarrit, dyshimet paraprake janë se ai mund të jetë shkaktuar qëllimisht për pastrimin e territorit nga barishtet dhe shkurret. Megjithatë, autoritetet theksojnë se shkaku i zjarrit do të përcaktohet vetëm pas përfundimit të hetimeve.

Kjo është vatra e dytë e zjarrit e regjistruar në të njëjtën zonë gjatë ditëve të fundit, ndërsa autoritetet vijojnë monitorimin e situatës.