EGJIPT – Paraqitja e Egjiptit në Kupën e Botës 2026 është shpërblyer me një bonus të veçantë për futbollistët e kombëtares.

Sipërmarrësi egjiptian Naguib Sawiris, pronar i një kompanie që sponsorizon ekipin kombëtar, ka njoftuar se do t’u japë një shpërblim prej 1 milion stërlinash egjiptiane, rreth 17 500 euro, secilit prej lojtarëve të “Faraonëve”.

Ky vendim erdhi si shenjë vlerësimi për paraqitjen e skuadrës në Botërorin e zhvilluar në SHBA, Kanada dhe Meksikë, ku Egjipti arriti deri në fazën e 1/8 së finaleve.

Ecuria e kombëtares afrikane u ndërpre nga Argjentina, pas një sfide spektakolare që përfundoi me rezultatin 3-2, ku Egjipti dha një paraqitje të fortë përballë kampionëve në fuqi.

Presidenti i Federatës Egjiptiane të Futbollit, Hany Abo Rida, përshëndeti nismën e biznesmenit Sawiris, duke e cilësuar një motivim të rëndësishëm për ekipin.

“Ky gjest do të motivojë skuadrën aktuale për të konsoliduar sukseset e arritura dhe do të frymëzojë brezin e ri të futbollistëve egjiptianë”, deklaroi kreu i federatës.

Bonusi shihet si një vlerësim për një nga paraqitjet më të mira të Egjiptit në historinë e pjesëmarrjeve të tij në Kupën e Botës.