TIRANË – Protestat masive që po zhvillohen në kryeqytet kundër qeverisë kanë marrë një vëmendje dhe mbështetje të rëndësishme ndërkombëtare. Eurodeputetja franceze dhe aktivistja për mbrojtjen e mjedisit dhe çështjeve sociale, Emma Fourreau, ka udhëtuar drejt Tiranës për të shprehur mbështetjen e saj ndaj kauzës qytetare.

Gjatë qëndrimit në Shqipëri, Fourreau ka zhvilluar një takim me deputeten Marjana Koçeku, e cila së fundmi u largua nga grupi parlamentar i Partisë Socialiste pikërisht pas nisjes së këtyre protestave. Përmes një reagimi në rrjetet sociale, Koçeku ka bërë të ditur se fokusi i bisedës ishte rëndësia e angazhimit qytetar dhe mbrojtja e mjedisit.

"Folëm për çështjen e mjedisit dhe për rëndësinë e angazhimit qytetar dhe politik në mbrojtje të natyrës. Mjedisi nuk njeh parti. Natyra nuk negocion me vendime të gabuara. Ajo ose mbrohet ose humbet," ka deklaruar Koçeku.

Deputetja shtoi më tej se mbrojtja e natyrës nuk përbën pengesë për zhvillimin e vendit, por është prova më e madhe e përgjegjësisë së një shteti ndaj qytetarëve të vet dhe ndaj Bashkimit Europian, ku Shqipëria synon të integrohet. Takimi dhe prania e eurodeputetes franceze sinjalizojnë një ndërkombëtarizim të kërkesave të protestuesve, ku çështjet sociale dhe ato mjedisore po zënë një peshë kryesore në reagimin ndaj qeverisë.