TIRANË – Kreu i grupit parlamentar të Partisë Socialiste, Taulant Balla, ka reaguar ndaj një letre anonime që, sipas tij, i është drejtuar nga një anëtar pa emër i Lidhjes së Hoxhallarëve të Shqipërisë (LHSH).

Në reagimin e tij publik, Balla ka mohuar kategorikisht pretendimet se ka ndërhyrë në çështjet e Komunitetit Mysliman të Shqipërisë apo se ka kërkuar largimin, shkarkimin ose ndëshkimin e ndonjë hoxheje, myftiu apo kleriku fetar.

“Deklaroj në mënyrën më kategorike se nuk kam ndërhyrë kurrë dhe nuk kam kërkuar kurrë nga Komuniteti Mysliman i Shqipërisë shkarkimin, largimin apo ndëshkimin e asnjë hoxhe, myftiu apo kleriku fetar. Ky pretendim është i pavërtetë”, është shprehur Balla.

Ai u ka kërkuar autorëve të letrës që të bëjnë publike provat që mbështesin akuzat e tyre, ose në të kundërt të tërheqin pretendimet.

Balla ka kritikuar gjithashtu përdorimin e anonimatit, duke deklaruar se akuzat pa emër dhe pa prova nuk i shërbejnë debatit publik.

“Anonimati nuk është guxim qytetar; është mënyra më e lehtë për të hedhur baltë pa mbajtur përgjegjësi”, ka shkruar ai.

Kreu i grupit parlamentar socialist ka theksuar se politika dhe feja duhet të mbeten të ndara, ndërsa ka nënvizuar se ka respektuar autonominë e institucioneve fetare dhe lirinë e besimit.

Në përfundim të reagimit të tij, Balla ka deklaruar se Shqipëria garanton lirinë fetare dhe se shteti nuk duhet të ndërhyjë në jetën e komuniteteve fetare.