Të gjitha automjetet e reja që hidhen në tregun e Bashkimit Evropian duhet të pajisen me sistemin **Advanced Driver Distraction Warning (ADDW)**, i cili monitoron vëmendjen e shoferit dhe e paralajmëron në rast shpërqendrimi gjatë drejtimit.

Masa synon rritjen e sigurisë rrugore dhe është pjesë e paketës së re të sistemeve të detyrueshme të sigurisë për automjetet në BE.

Sistemi funksionon përmes një kamere të vendosur në pjesën e përparme të kabinës, e cila analizon drejtimin e shikimit, lëvizjet e kokës dhe pozicionin e syve të drejtuesit. Nëse konstatohet se vëmendja largohet nga rruga përtej kufijve të përcaktuar, shoferi paralajmërohet.

Sipas rregullores, në shpejtësi 20–50 km/h sistemi aktivizohet kur shoferi e largon shikimin nga rruga për gjashtë sekonda ose më shumë, ndërsa mbi 50 km/h paralajmërimi jepet pas 3.5 sekondash shpërqendrim.

Legjislacioni i BE-së parashikon që sistemi të përpunojë të dhënat vetëm brenda automjetit, pa i transmetuar ato në internet apo te prodhuesit dhe autoritetet. Gjithashtu, nuk lejohet mbledhja e të dhënave biometrike apo identifikimi i drejtuesit të mjetit.

Detyrimi zbatohet për të gjitha automjetet e reja që dalin në tregun e Bashkimit Evropian, ndërsa automjetet që janë tashmë në qarkullim nuk preken nga rregullorja. Për automjetet e rënda dhe kamionët, kërkesa do të hyjë në fuqi nga viti 2029.