TIRANË – Ilir Selmanaj, i akuzuar si pjesë e grupit të njohur si klani "Duka" për vrasjen e ish-policit Santiago Malko, është paraqitur këtë të hënë në Gjykatën e Posaçme kundër Korrupsionit dhe Krimit të Organizuar (GJKKO), nën masa të shtuara sigurie.

I shoqëruar nga forca të shumta policore, Selmanaj mori pjesë në seancën e zhvilluar në kuadër të procesit në Apelin e GJKKO-së. Ai ndodhet aktualisht në masën e sigurisë "arrest në shtëpi", pas tejkalimit të afateve të paraburgimit, ndërsa në shkallën e parë është dënuar me 26 vite burg.

Seanca zhvillohet pak kohë pasi Selmanaj i mbijetoi një atentati pranë banesës së tij, ngjarje që ka çuar në shtimin e masave të sigurisë gjatë paraqitjes së tij në gjykatë.

Çështja lidhet me vrasjen e ish-policit Santiago Malko, një nga atentatet më të bujshme të viteve të fundit. Malko u ekzekutua mbrëmjen e 27 gushtit 2019 në zonën e Xhamllikut, në Tiranë, teksa udhëtonte me automjetin e tij tip "BMW X5". Ai konsiderohej një person me precedentë penalë dhe ishte përfolur për lidhje me Ervis Martinajn, fati i të cilit mbetet ende i paqartë.

Për këtë ngjarje, Prokuroria e Posaçme ngriti akuza ndaj tetë personave, mes tyre Leonard Duka, Erlis Duka, Ilir Selmanaj, Ervis Metani, Fatmir Hyseni, Dritan Agaj, Aleksandër Maxhaku dhe Xhoni Nica, të cilët akuzohen si pjesë e grupit kriminal të përfshirë në organizimin dhe ekzekutimin e atentatit.