VLORË – Një aksident rrugor me pasojë plagosjen e dy personave është regjistruar mesditën e së hënës në zonën e Pyllit të Sodës, në qytetin e Vlorës.

Sipas informacioneve paraprake, në aksident janë përfshirë një kamion dhe një automjet. Përplasja ka qenë e fortë, duke shkaktuar dëme të konsiderueshme materiale në të dy mjetet.

Si pasojë e aksidentit, dy gra, nënë e bijë, të cilat udhëtonin në automjet, kanë mbetur të plagosura.

Ato janë transportuar në Spitalin Rajonal të Vlorës, ku po marrin trajtim mjekësor. Deri më tani nuk ka informacion zyrtar mbi gjendjen e tyre shëndetësore, megjithatë një burim policor i tha noa.al se gjendja e tyre aktualisht është jashtë rrezikut për jetën.

Në vendngjarje kanë mbërritur shërbimet e Policisë dhe grupi hetimor, të cilët po punojnë për të dokumentuar rrethanat e aksidentit dhe për të përcaktuar shkaqet që çuan në përplasjen e mjeteve.

Për shkak të ngjarjes, qarkullimi i automjeteve në këtë segment rrugor u ngadalësua përkohësisht, ndërsa policia mori masa për normalizimin e trafikut.