SHKUP – Një ngjarje e rëndë ka tronditur Shkupin mbrëmjen e së dielës, ku një 31-vjeçar ka vrarë me thikë babanë e tij për të mbrojtur të ëmën nga dhuna fizike. Ngjarja u regjistrua rreth orës 22:30 në një banesë në rrethinën e "Bit Pazarit".

Sipas njoftimit zyrtar nga Ministria e Punëve të Brendshme e Maqedonisë së Veriut, 52-vjeçari me iniciale E.L., i cili ndodhej nën efektin e alkoolit, ka sulmuar fizikisht bashkëshorten e tij 54-vjeçare. Në këtë moment ka ndërhyrë djali i tyre, shtetasi me iniciale B.Xh., 31 vjeç, i cili e ka goditur të atin me thikë, duke i shkaktuar plagë që rezultuan fatale për jetën.

Forcat e policisë kanë mbërritur menjëherë në vendngjarje duke bërë të mundur arrestimin dhe shoqërimin në paraburgim të të dyshuarit rreth orës 23:00.

Nga ana tjetër, gruaja e plagosur nga dhuna e bashkëshortit është transportuar me urgjencë drejt Spitalit të Përgjithshëm të Qytetit "Shën Naumi i Ohrit" për të marrë ndihmën e nevojshme mjekësore. Me urdhër të prokurorit publik, trupi i pajetë i 52-vjeçarit është dërguar në morg për kryerjen e autopsisë, ndërsa hetimet po vijojnë për zbardhjen e plotë të rrethanave të ngjarjes.