BRUKSEL – Temperaturat ekstreme që përfshinë Evropën Perëndimore në fund të muajit qershor kanë lënë pas pasoja tragjike për jetën e njerëzve. Sipas të dhënave zyrtare të publikuara nga rrjeti evropian i monitorimit të vdekshmërisë, EuroMOMO, si pasojë e valëve të të nxehtit janë regjistruar mbi 10 mijë humbje jete.

Raporti i EuroMOMO-s, organizatë që mbështetet direkt nga Qendra Evropiane për Parandalimin dhe Kontrollin e Sëmundjeve (ECDC) dhe Organizata Botërore e Shëndetësisë (OBSH), zbulon se grupmosha më e goditur ishin të moshuarit. Mbi 9 mijë prej viktimave të konfirmuara i përkisnin moshës 65 vjeç e lart, që përbën edhe kategorinë më vulnerabël ndaj temperaturave të larta.

Të dhënat paraprake tregojnë se goditjen më të rëndë e kanë marrë shtetet si Belgjika, Britania e Madhe, Franca dhe Spanja, ku termometri shënoi vlera rekord dhe ku u regjistruan mijëra raste të vdekshmërisë shtesë për shkak të vapës afrikane.

Lidhur me këtë situatë, grupi ndërkombëtar i shkencëtarëve World Weather Attribution ka dalë në përfundimin se këto valë kaq anormale dhe intensive të të nxehtit do të kishin qenë “pothuajse të pamundura” për t’u shënuar pa efektin e drejtpërdrejtë dhe ndikimin e ndryshimeve klimatike globale.