BRUKSEL – Presidentja e Komisionit Evropian, Ursula von der Leyen, ka bërë thirrje për ndërmarrjen e masave më të ashpra dhe të menjëhershme për mbrojtjen e fëmijëve në hapësirën virtuale. Duke u bazuar në gjetjet e fundit të paraqitura nga Paneli Special për Sigurinë e Fëmijëve në Internet, Von der Leyen theksoi se këto të dhëna do të shërbejnë si bazë për hartimin e politikave të ardhshme ligjore të Bashkimit Evropian.

Në fjalën e saj, shefja e Ekzekutivit të BE-së mbështeti fuqishëm vendosjen e një moshe minimale për qasjen në platformat sociale, duke propozuar një skemë të diferencuar sipas grupmoshave. Sipas këtij propozimi, fëmijët nën moshën 13 vjeç nuk duhet të lejohen të lundrojnë në mediat sociale pa mbikëqyrjen e prindërve apo të rriturve, dhe ky akses duhet të jetë i kufizuar në kohë.

“Mediat sociale nuk janë lodër”, deklaroi prerazi Von der Leyen, duke tërhequr vëmendjen se liria e pakufizuar që kompanitë e mëdha teknologjike (Big Tech) kanë aktualisht ndaj fëmijëve po sjell rritje të rasteve të problemeve të shëndetit mendor, varësisë digjitale dhe pasojave të rënda psikologjike te të miturit.

Sipas statistikave shqetësuese të bëra publike në raportin e panelit special, të rinjtë kalojnë mesatarisht katër deri në gjashtë orë në ditë përpara ekraneve të pajisjeve teknologjike. Po ashtu, të dhënat dëshmojnë se afërsisht 60% e fëmijëve kanë përjetuar shqetësime emocionale apo probleme psikosociale si pasojë e drejtpërdrejtë e përdorimit të internetit dhe rrjeteve sociale.