MAT – Ka përfunduar në mënyrë tragjike operacioni i kërkimit për alpinistin Erkin Lika. Trupi i pajetë i 39-vjeçarit është gjetur dhe nxjerrë vetëm pak minuta më parë nga ujërat e lumit pranë Urës së Vashës, pas dy ditë kërkimesh intensive në një terren jashtëzakonisht të vështirë.

Ngjarja e rëndë ndodhi dy ditë më parë, kur Lika, i cili ishte anëtar aktiv i grupit të kërkim-shpëtimit malor, po stërvitej së bashku me kolegët e tij në faqen shkëmbore të zonës. Gjatë kryerjes së manovrave të ngjitjes me litar, 39-vjeçari ka pësuar një aksident fatal duke rënë në humnerë dhe duke përfunduar në shtratin e lumit.

Për shkak të terrenit shumë të thepisur dhe kushteve të vështira gjeografike, lokalizimi i tij fillestar ishte i pamundur. Në operacionin e gjerë të kërkimit, krahas kolegëve të tij shqiptarë, u angazhua menjëherë edhe Shërbimi i Kërkim-Shpëtimit Malor i Kosovës, të cilët bënë të mundur nxjerrjen e trupit të pajetë nga humnera pas dy ditësh kërkime të pandërprera.