TIRANË – Policia e Shtetit ka rritur intensitetin e hetimeve pas denoncimeve të njëpasnjëshme nga biznese private, të cilat pretendojnë se kanë rënë pre e një sulmi të koordinuar përmes komenteve dhe vlerësimeve negative në platformën Google. Sektori i Krimit Kibernetik po trajton aktualisht 15 denoncime zyrtare të depozituara nga subjektet e dëmtuara.

Deri në këtë fazë të hetimeve, uniformat blu kanë arritur të identifikojnë më shumë se 200 persona, të cilët dyshohet se kanë përdorur llogaritë e tyre reale në rrjetet sociale për të publikuar apo shpërndarë vlerësime negative (1-star reviews) ndaj këtyre bizneseve. Autoritetet po kryejnë verifikime të imtësishme për secilin prej tyre për të provuar nëse kanë vepruar si pjesë e një rrjeti të organizuar dhe nëse veprimet e tyre përmbajnë elemente të konsumimit të veprave penale.

Burime nga grupi hetimor bëjnë me dije se çështja po vlerësohet nën kuadrin e disa veprave të mundshme penale, ku përfshihen "manipulimi i tregut", "manipulimi i çmimeve", "përhapja e informacioneve të rreme", "shpifja" dhe "falsifikimi kompjuterik".

Objektivi kryesor i strukturave të hetimit kibernetik mbetet zbulimi i organizatorëve dhe koordinatorëve të kësaj fushate denigruese, e cila, sipas ankesave të bizneseve, u ka shkaktuar dëme të konsiderueshme financiare në aktivitetin e tyre ekonomik dhe ka dëmtuar rëndë imazhin e tyre në treg.