TIRANË – Kryetari i Grupit Parlamentar të Partisë Socialiste, Taulant Balla, ka ashpërsuar tonet në seancën e sotme plenare, duke akuzuar deputetët e opozitës për politizim të protestave mjedisore. Përmes një replike të fortë nga foltorja e Parlamentit, Balla deklaroi se një kauzë e nisur e pastër për mjedisin është degraduar për qëllime politike.

“Unë nuk tallem me protestën. Protesta, kur nisi, ishte diçka e bukur; e nisi në emër të disa kërkesave që lidhen për mjedisin, por siç e kam thënë, kur hyri Saliu, hyri Gonja, hyri Qorri, apo ndonjë tjetër, flamingot fluturuan dhe ngelën sorra si puna jote. Flamingot janë një zog shumë i pastër dhe nuk rrinë me llumin, prandaj ikën nga ju,” u shpreh Balla.

Gjatë fjalës së tij, kreu i deputetëve socialistë adresoi akuza të drejtpërdrejta ndaj deputetit Agron Shehaj, duke i mohuar të drejtën politike dhe morale për të folur në emër të popullit dhe duke e konsideruar praninë e tij në sallë si "aksidentale" pas dorëheqjes së një tjetër deputeti.

Në vijim të replikës, Balla hodhi dyshime mbi pasurinë e palës tjetër, duke kërkuar publikisht sqarime për transaksione financiare. “Sqaro se si mund të shesë një njeri një apartament 151 m2 për 15 milionë euro. Kaq. Por petat e byrekut po hapen, siç u hapën edhe historitë e përfshirjes së lloj-lloj balte, lloj-lloj llumi,” përfundoi kryetari i grupit të PS-së.