TIRANË – Shqipëria ka regjistruar rënien më të madhe të popullsisë në Europë gjatë 25 viteve të fundit. Sipas të dhënave të publikuara nga Eurostat, bazuar në statistikat e INSTAT, vendi numëronte rreth 2.34 milionë banorë më 1 janar 2026, nga 3.06 milionë në vitin 2000.

Në këtë periudhë, popullsia është tkurrur me rreth 721 mijë banorë, ose 23.6%, duke e renditur Shqipërinë në krye të vendeve europiane për ritmin e rënies demografike. Pas saj renditet Bullgaria me një tkurrje prej 21.6%, ndërsa Kosova, e llogaritur nga viti 2003, ka shënuar një rënie prej 19.3%.

Sipas analizës së të dhënave, emigracioni i lartë, rënia e lindshmërisë dhe plakja e popullsisë mbeten faktorët kryesorë që po ndikojnë në këtë zhvillim. Largimi i vazhdueshëm i të rinjve ka reduktuar numrin e banorëve dhe njëkohësisht bazën e popullsisë në moshë riprodhuese, duke sjellë ulje të lindjeve dhe rritje të moshës mesatare.

Të dhënat e INSTAT tregojnë se mosha mediane e popullsisë shqiptare ka arritur në 45 vjeç më 1 janar 2026, nga 34.2 vjeç në vitin 2014. Ndërkohë, gjatë vitit 2025 u regjistrua niveli më i ulët historik i lindjeve në periudhën pas tranzicionit, me rreth 22.5 mijë lindje.

Ekspertët paralajmërojnë se tkurrja e popullsisë po ndikon drejtpërdrejt në tregun e punës, konsumin dhe qëndrueshmërinë e skemës së pensioneve, ndërsa bizneset po përballen gjithnjë e më shumë me mungesë të fuqisë punëtore.

Ndryshe nga Shqipëria, Bashkimi Europian vijon të shënojë rritje të popullsisë. Sipas Eurostat, më 1 janar 2026 popullsia e BE-së arriti në 452 milionë banorë, kryesisht falë emigracionit neto pozitiv, i cili ka kompensuar bilancin negativ natyror mes lindjeve dhe vdekjeve.