Protestuesit kanë përmbyllur fjalimet e mbajtura para godinës së Kryeministrisë dhe kanë vijuar marshimin në rrugët e kryeqytetit, në kuadër të protestës së 43-të qytetare.

Gjatë tubimit, disa qytetarë morën fjalën në podiumin e ngritur përpara Kryeministrisë, ku shprehën shqetësimet e tyre dhe përsëritën kërkesat drejtuar institucioneve.

Marshimi është shoqëruar me thirrje si: "Rama, jep dorëheqjen!" dhe "Rama në burg, Berisha në burg!", ndërsa pjesëmarrësit kanë kërkuar ndryshime politike dhe institucionale.

Sipas organizatorëve, protestuesit vijojnë të kërkojnë plotësimin e pesë kërkesave të tyre, ndër të cilat dorëheqjen e kryeministrit Edi Rama, krijimin e një qeverie teknike dhe ndërmarrjen e ndryshimeve kushtetuese.

Protesta u zhvillua në mënyrë paqësore, ndërsa marshimi vijoi në disa prej akseve kryesore të Tiranës, nën mbikëqyrjen e forcave të Policisë.