Me vetëm katër kombëtare të mbetura në garë për trofeun e Kupës së Botës 2026, superkompjuteri i kompanisë së statistikave sportive Opta ka përditësuar parashikimet e tij për skuadrën favorite që pritet të shpallet kampione.

Sipas simulimeve të Opta-s, Franca është favoritja kryesore për të fituar turneun, duke pasur 34.05 për qind shanse për të ngritur trofeun dhe 57.70 për qind probabilitet për të mposhtur Spanjën në gjysmëfinale.

Spanja renditet si pretendentja e dytë, me 42.30 për qind shanse për të siguruar finalen dhe 23.45 për qind mundësi për t’u shpallur kampione e botës.

Në gjysmëfinalen tjetër, Anglia konsiderohet një favorite e lehtë ndaj Argjentinës. Sipas superkompjuterit, anglezët kanë 50.94 për qind shanse për të arritur në finale dhe 21.94 për qind për të fituar titullin e parë botëror pas vitit 1966.

Nga katër skuadrat e mbetura, Argjentina është ajo me probabilitetin më të ulët për triumfin final. Kampionët në fuqi kanë 49.06 për qind shanse për të eliminuar Anglinë në gjysmëfinale dhe 20.55 për qind mundësi për të mbrojtur titullin, një arritje që do t’i bënte vetëm kombëtaren e tretë në histori që fiton dy Kupa Bote radhazi.

Katër skuadrat që vijojnë garën për trofeun janë Franca, Spanja, Anglia dhe Argjentina. Në gjysmëfinalen e parë, Franca do të përballet me Spanjën, ndërsa një ditë më vonë Anglia do të luajë ndaj Argjentinës.

Parashikimet e superkompjuterit Opta për fitimin e Kupës së Botës 2026:

Franca – 34.05% Spanja – 23.45% Anglia – 21.94% Argjentina – 20.55%

Megjithëse Franca mbetet favoritja sipas analizave statistikore, diferencat mes katër gjysmëfinalisteve janë relativisht të vogla, çka lë të hapur garën për trofeun e Botërorit 2026.