Në kushtet e temperaturave të larta që kanë përfshirë vendin, Shërbimi Zjarrfikës i Gramshit ka ndërmarrë një nismë ndërgjegjësuese për sensibilizimin e qytetarëve dhe turistëve mbi rrezikun e zjarreve gjatë sezonit veror.

Në kuadër të kësaj nisme, efektivët e zjarrfikëses kanë ofruar ujë për freskim në sheshet e qytetit, duke përcjellë njëkohësisht mesazhe për kujdes të shtuar ndaj zjarreve në natyrë.

Përmes një thirrjeje publike, Shërbimi Zjarrfikës u ka kërkuar qytetarëve të shmangin ndezjen e zjarreve, duke theksuar se edhe një shkëndijë e vetme mund të shkaktojë pasoja të rënda për pyjet, mjedisin dhe sigurinë e njerëzve.

"Ne zgjodhëm t’ju freskojmë me ujë. Ju zgjidhni të mos ndizni zjarr", është mesazhi i përcjellë nga Shërbimi Zjarrfikës i Gramshit.

Autoritetet vijojnë të bëjnë apel për përgjegjshmëri, duke qenë se temperaturat e larta dhe moti i thatë rrisin ndjeshëm rrezikun e shpërthimit dhe përhapjes së zjarreve në të gjithë vendin.