Një ngjarje e rëndë është regjistruar në fshatin Orizaj, në bashkinë e Beratit, ku një 15-vjeçar ka humbur jetën pasi u fut në lumë për t’u larë.

Viktima është identifikuar si Fatjon Sadushi. Sipas informacioneve paraprake, ai kishte qenë duke punuar në arë së bashku me babanë e tij. Gjatë një pushimi, 15-vjeçari ka hyrë në lumë për t’u freskuar, por është marrë nga rrjedha e fortë e ujit.

Babai i tij ka hyrë menjëherë në lumë në përpjekje për ta shpëtuar dhe ka arritur ta nxjerrë në breg. Megjithatë, pavarësisht përpjekjeve, i mituri nuk ka mundur të mbijetojë.

Në vendngjarje mbërritën shërbimet e Policisë dhe ekipi i urgjencës mjekësore. Trupi i pajetë u transportua në Morgun e Spitalit Rajonal të Beratit, ku do t’i nënshtrohet ekspertizës mjeko-ligjore.

Grupi hetimor po vijon veprimet për zbardhjen dhe dokumentimin e plotë të rrethanave të kësaj ngjarjeje tragjike.