Abuja, Nigeri – Ushtria e Nigerisë ka liruar 44 nxënës dhe mësues, të cilët ishin mbajtur peng për rreth dy muaj pas rrëmbimit nga tre institucione arsimore në shtetin Oyo.

Operacioni i shpëtimit çoi gjithashtu në arrestimin e disa personave të dyshuar për përfshirje në rrëmbim, ndërsa autoritetet njoftuan se gjatë ndërhyrjes humbën jetën disa pjesëtarë të forcave të sigurisë.

Të liruarit janë dërguar në një spital për kontrolle dhe trajtim mjekësor, ndërsa vendndodhja e këtij institucioni nuk është bërë publike nga autoritetet. Pas përfundimit të procedurave mjekësore, ata pritet t’u rikthehen familjeve të tyre.

Rrëmbimi ndodhi më 15 maj në zonën Osiire të shtetit Oyo, ku u morën peng nxënës dhe mësues nga tre shkolla. Mes viktimave të rrëmbimit kishte fëmijë dhe të rinj të moshave nga 2 deri në 18 vjeç.

Sipas ushtrisë nigeriane, operacioni për lirimin e pengjeve zgjati rreth një muaj dhe përfshiu forcat ushtarake, policinë, agjencitë e inteligjencës dhe grupet lokale të vetëmbrojtjes. Gjatë operacionit u goditën edhe strukturat mbështetëse të rrjetit të rrëmbyesve, përfshirë bazat e tyre në zonat pyjore të Parkut Kombëtar Old Oyo.

Autoritetet vijojnë operacionet për identifikimin dhe arrestimin e personave të tjerë të përfshirë në ngjarje.

Lirimi i nxënësve dhe mësuesve është pritur me lehtësim nga familjet dhe komuniteti arsimor, ndërsa sindikatat e mësuesve kanë kërkuar forcimin e masave të sigurisë në shkolla.

Ngjarja ka rikthyer shqetësimet për fenomenin e rrëmbimeve në Nigeri, ku sulme të tilla kanë prekur veçanërisht rajonet veriore të vendit, por vitet e fundit janë shfaqur edhe në zona të tjera, përfshirë jugperëndimin.