Romë – Paolo Maldini rikthehet në skenën e futbollit italian, këtë herë në një rol drejtues. Ish-kapiteni legjendar i Milanit ka pranuar ofertën e presidentit të ri të Federatës Italiane të Futbollit (FIGC), Giovanni Malagò, duke u emëruar Drejtor Teknik i kombëtares italiane.

Maldini, i cili u largua nga drejtimi i Milanit pas disa vitesh në strukturën drejtuese të klubit ku fitoi titullin kampion në sezonin 2021-2022, do të marrë një rol kyç në organizimin sportiv të “Azzurrëve”.

Krahas tij, në këtë projekt do të jetë edhe ish-futbollisti brazilian Leonardo, i cili do të ushtrojë funksionin e këshilltarit.

Në njoftimin zyrtar, FIGC bëri të ditur: “Presidenti i FIGC-së, Giovanni Malagò, ka kënaqësinë të njoftojë se Paolo Maldini ka pranuar postin e Drejtorit Teknik të Federatës. Paolo Maldini do ta ushtrojë këtë detyrë së bashku me Leonardon si këshilltar. Giovanni Malagò do t’i besojë gjithashtu Paolo Maldinit presidencën e Club Italia”.

Sfida e parë e rëndësishme për Maldinin në detyrën e re do të jetë zgjedhja e trajnerit të ardhshëm të kombëtares italiane. Sipas mediave italiane, kandidaturat kryesore janë Roberto Mancini dhe Antonio Conte, ndërsa Mancini shihet aktualisht si një nga favoritët për të marrë drejtimin e ekipit kombëtar.

Vendimi për trajnerin e ri të Italisë pritet të merret dhe të bëhet publik në ditët e ardhshme, ndërsa Maldini do të ketë rolin kryesor në përcaktimin e projektit të ri sportiv të “Azzurrëve”.