Toronto, Kanada – Dy persona humbën jetën dhe katër të tjerë mbetën të plagosur pas një incidenti me armë zjarri që ndodhi gjatë festivalit vjetor latin "Salsa në St. Clair" në Toronto.

Sipas autoriteteve kanadeze, të shtënat nisën pas një shkëmbimi zjarri mes dy personave gjatë zhvillimit të aktivitetit. Në vendngjarje u gjetën gjashtë persona të plagosur nga armët e zjarrit, ndërsa dy prej tyre nuk arritën t’u mbijetonin plagëve.

Policia bëri të ditur se në zonë janë sekuestruar dy armë zjarri dhe se hetimet janë në vijim për të zbardhur plotësisht rrethanat e ngjarjes. Deri më tani nuk është njoftuar për persona të arrestuar.

Kryeministri i Kanadasë, Mark Carney, reagoi pas ngjarjes duke shprehur ngushëllimet për familjet e viktimave dhe mbështetjen për të plagosurit, si edhe për të gjithë ata që u prekën nga incidenti.

Festivali "Salsa në St. Clair", i cili zhvillohet çdo vit në Toronto dhe promovon muzikën, kulturën dhe vallëzimin latin, u mbajt këtë vit më 11 dhe 12 korrik, duke shënuar edicionin e tij të 22-të.