Një 72-vjeçar ka humbur jetën pasditen e së shtunës, pasi banesa e tij në lagjen nr. 13 të qytetit të Korçës u përfshi nga flakët.

Viktima është identifikuar si Urim Hysolli. Sipas informacioneve paraprake, ai ishte rikthyer prej pak javësh në apartamentin e tij, të cilin prej rreth 10 vitesh e kishte dhënë me qira dhe jetonte së bashku me qiramarrësit.

Burime nga vendngjarja bëjnë me dije se disa ditë më parë, 72-vjeçari dyshohet se kishte tentuar t’i vinte zjarrin banesës, por flakët ishin shuar në kohë nga qiramarrësi.

Edhe pasditen e sotme, sipas dyshimeve paraprake të hetuesve, i moshuari i ka vënë sërish zjarrin apartamentit, ndërsa flakët janë përhapur me shpejtësi në të gjithë banesën.

Megjithëse në vendngjarje mbërritën shërbimet zjarrfikëse dhe efektivët e Policisë, 72-vjeçari nuk mundi të shpëtohej. Dyshohet se ai ka humbur jetën si pasojë e asfiksisë nga tymi.

Për arsye sigurie, banorët e pallatit u evakuuan, ndërsa forcat zjarrfikëse vunë nën kontroll flakët dhe vijuan punën për shuarjen e plotë të zjarrit.

Policia ka nisur hetimet për zbardhjen e plotë të rrethanave të ngjarjes. Hetuesit po marrin në pyetje banorët e pallatit dhe qiramarrësit, ndërsa pritet që ekspertiza të përcaktojë shkakun përfundimtar të zjarrit.