Një armë e dytë zjarri është gjetur nga Policia pranë vendit ku mbrëmjen e 9 korrikut u vra Ilir Gjini, në lagjen “Erdogan” të qytetit të Laçit.

Sipas informacioneve paraprake, arma është zbuluar pas një kontrolli të imtësishëm të kryer nga grupi hetimor, i cili është orientuar edhe nga deklarimet e personave të shoqëruar për këtë ngjarje.

Arma e sekuestruar është një revolver dhe është dërguar për ekspertizë balistike. Përmes saj pritet të përcaktohet nëse mjeti është përdorur gjatë konfliktit, kujt i përket dhe nëse ka pasur shkëmbim zjarri mes personave të përfshirë.

Zbulimi i armës së dytë ka ngritur dyshimet e hetuesve se në vendin e krimit mund të kenë qenë të pranishëm edhe persona të tjerë, përveç viktimës dhe autorit të dyshuar.

Për vrasjen e Ilir Gjinit është shpallur në kërkim Emiljan Suti, ndërsa hetimet vijojnë për zbardhjen e plotë të dinamikës së ngjarjes dhe identifikimin e personave të tjerë që mund të kenë pasur rol në konflikt.