Shërbimet e Policisë së Lezhës dhe ekipi i urgjencës mjekësore kanë ndërhyrë për t’i ardhur në ndihmë një 71-vjeçari, i cili u dëmtua në një zonë malore mbi Kalanë e Lezhës.

Sipas njoftimit zyrtar, pas marrjes së sinjalizimit, efektivët e Policisë, në bashkëpunim me ekipin e Spitalit Rajonal të Lezhës, u nisën menjëherë drejt vendngjarjes.

Dyshohet se i moshuari, i cili ishte duke ruajtur bagëtitë, është rrëzuar dhe ka pësuar dëmtime që ia bënë të pamundur lëvizjen.

Pas ndërhyrjes së ekipeve të shpëtimit, 71-vjeçari u transportua fillimisht në Spitalin Rajonal të Lezhës, ku mori ndihmën e parë mjekësore. Për shkak të gjendjes së tij shëndetësore dhe nevojës për trajtim më të specializuar, ai u dërgua më pas në Spitalin e Traumës në Tiranë.

Policia e Lezhës thekson se mbetet e angazhuar në ofrimin e ndihmës për qytetarët dhe apelon që, në çdo rast emergjence apo problematike, të kontaktohet numri pa pagesë 112.