Policia Kufitare e Vlorës ka ndëshkuar me gjoba administrative dy drejtues mjetesh lundruese, pasi u konstatuan duke lundruar pranë bregut dhe duke rrezikuar sigurinë e pushuesve.

Sipas njoftimit të Policisë, një prej rasteve u evidentua në plazhin e Semanit, ku drejtuesi i një motori uji (Jet Ski), i identifikuar me inicialet E. D., u kap duke lëvizur brenda zonës së ndaluar për mjetet lundruese. Për shkeljen e konstatuar, ai u gjobit me 500 mijë lekë të rinj dhe mjeti iu bllokua administrativisht.

Rasti i dytë u regjistrua pranë plazhit të Hidrovorit, në afërsi të Zvërnecit, ku shërbimet e Policisë Kufitare konstatuan një gomone që lundronte brenda perimetrit të sigurisë, pranë pushuesve. Gjatë verifikimeve rezultoi se drejtuesi i saj, me inicialet J. H., nuk dispononte dokumentacionin përkatës të mjetit lundrues.

Për shkeljet e konstatuara, ndaj tij u vendos një masë administrative prej 510 mijë lekësh të rinj, ndërsa edhe gomonia u bllokua administrativisht.

Policia e Shtetit u bën apel të gjithë drejtuesve dhe përdoruesve të mjeteve lundruese, si dhe subjekteve që operojnë me to, të respektojnë rregullat e lundrimit dhe perimetrat e sigurisë, duke paralajmëruar se kontrollet do të vijojnë gjatë gjithë sezonit turistik dhe çdo shkelje do të ndëshkohet sipas ligjit, me qëllim garantimin e sigurisë së pushuesve.