Prokuroria e Shkodrës ka vendosur të zgjasë me tre muaj afatin e hetimeve për vrasjen e Pavlin Prekës, ndërsa vijon mbledhja e provave dhe zbardhja e plotë e rrethanave të ngjarjes.

Sipas hetimeve paraprake, autoritetet dyshojnë se krimi është planifikuar dhe kryer në bashkëpunim nga disa persona. Në fokus të hetimit janë tre të dyshuar, për të cilët Prokuroria pretendon se kanë pasur role në organizimin dhe ekzekutimin e vrasjes.

Pista kryesore e hetimit lidhet me një konflikt me motive personale. Sipas organit të akuzës, ngjarja dyshohet të ketë ardhur si pasojë e kundërshtimit të familjarëve ndaj një marrëdhënieje që viktima kishte me vajzën e njërit prej personave të dyshuar. Hetuesit po verifikojnë edhe elementë të tjerë që mund të kenë ndikuar në përshkallëzimin e konfliktit.

Prokuroria ka vlerësuar se nevojiten veprime të mëtejshme hetimore, mes tyre përfundimi i ekspertizave, marrja në pyetje e personave që mund të kenë dijeni për ngjarjen, si dhe verifikimi i provave të administruara deri tani.

Pas përfundimit të këtyre procedurave, grupi hetimor pritet të përcaktojë përgjegjësitë penale të personave të dyshuar dhe të dalë me konkluzionet përfundimtare mbi rrethanat e vrasjes.