Pak orë para koncertit të reperit amerikan Kanye West, i planifikuar të nisë në orën 20:00, kryeministri Edi Rama ka publikuar pamjet e stadiumit të përfunduar ku do të zhvillohet eventi.

Në një reagim në rrjetet sociale, Rama e cilëson koncertin si një ngjarje me ndikim ndërkombëtar, duke theksuar se ai do ta vendosë Shqipërinë në hartën globale të adhuruesve të muzikës dhe do të ndikojë pozitivisht në promovimin e vendit si destinacion turistik.

Kreu i qeverisë iu përgjigj edhe kritikave lidhur me koston e organizimit të koncertit, duke argumentuar se fondi prej 4 milionë eurosh duhet parë si një investim dhe jo si shpenzim.

Sipas Ramës, fluksi i vizitorëve gjatë ditëve të fundit ka sjellë rritje të prenotimeve në hotele, apartamente turistike, restorante, bare, dyqane dhe shërbime transporti, ndërsa të ardhurat nga rritja e konsumit pritet të kompensojnë investimin.

Ai e konsideroi koncertin një formë të "marketingut global" për Shqipërinë, duke theksuar se organizimi i eventeve të kësaj përmase është një praktikë e ndjekur edhe nga vende të zhvilluara europiane për promovimin e imazhit dhe zhvillimin e turizmit.

Në fund të reagimit, Rama u shpreh se anulimi i koncertit do të dëmtonte imazhin e vendit, ndërsa nënvizoi se Shqipëria përfiton duke organizuar aktivitete ndërkombëtare që tërheqin vëmendjen e botës.