Tiranë, 11 Korrik 2026 – Strukturat e Drejtorisë Vendore të Policisë Tiranë kanë finalizuar me sukses operacionin e koduar “Last Bet”, duke sjellë goditjen e tre rasteve të organizimit të kundërligjshëm të lojërave të fatit dhe basteve sportive në kryeqytet. Si rezultat i ndërhyrjeve të sinkronizuara në zona të ndryshme, shërbimet e policisë kanë vënë në pranga dy shtetas në flagrancë, kanë shpallur në kërkim dy të tjerë, si dhe kanë proceduar penalisht katër qytetarë për përfshirje në aktivitete të paligjshme bixhozi.

Sipas të dhënave zyrtare, Komisariati i Policisë Nr. 1 ndërpreu aktivitetin në një mjedis të marrë me qira në rrugën “Aleks Çaçi”, ku u arrestua 22-vjeçari G. Zh. dhe u shpallën në kërkim shtetasit M. Zh., 50 vjeç dhe A. Zh., 25 vjeç. Në këtë mjedis u sekuestruan në cilësinë e provës materiale dy makineta lojëra fati, një tavolinë pokeri, letra bixhozi dhe çipsa. Paralelisht, Komisariati Nr. 5 arrestoi në Bathore shtetasin G. S.(J.), 39 vjeç, pasi në lokalin që ai administronte u gjetën një makinetë elektronike dhe një aparat celular që shërbenin për lojëra fati. Ndërkaq, Seksioni për Hetimin e Krimeve Kibernetike referoi materialet në Prokurori për katër shtetas të tjerë, të moshave nga 19 deri në 67 vjeç, të cilëve gjatë një kontrolli në një lokal në rrugën “Irfan Tomini” iu bllokuan telefonat celularë që përdoreshin për vënien e basteve sportive online.