Selanik, 11 Korrik 2026 – Një situatë e paprecedentë dhe momente tmerri janë regjistruar gjatë një fluturimi të kompanisë "Ryanair", i cili ishte nisur nga Selaniku i Greqisë me destinacion Memmingenin e Gjermanisë. Avioni është detyruar të bëjë një ulje emergjente vetëm pak minuta pas ngritjes, për shkak të shkëputjes së një prej dritareve të kabinës, ngjarje kjo që solli dekompresion të menjëhershëm në bord dhe plagosjen e një pasagjeri.

Sipas dëshmive tronditëse të udhëtarëve, avioni ndodhej në ajër prej rreth 10 minutash kur u dëgjua një shpërthim i fuqishëm, i ndjekur nga rënia e menjëhershme e lartësisë me rreth 2,700 metra. Në kabinë u aktivizuan menjëherë maskat e oksigjenit, ndërsa një rrymë e fuqishme ajri nisi të tërhiqte gjithçka drejt hapësirës së krijuar. Fatkeqësinë më të madhe e pësoi një shtetas serb, 61 vjeç, i cili për shkak të thithjes nga presioni përfundoi pjesërisht jashtë dritares, deri në nivelin e shpatullave. Ka qenë reagimi heroik i bashkëshortes së tij dhe pasagjerëve të tjerë afër, të cilët arritën ta mbanin dhe ta tërhiqnin me forcë brenda në kabinë, duke i shpëtuar jetën. 61-vjeçari u transportua me urgjencë në spital pas uljes, me djegie nga fërkimi dhe në gjendje të rëndë shoku, por jashtë rrezikut për jetën.

Përmes një deklarate zyrtare, kompania "Ryanair" konfirmoi incidentin, duke saktësuar se fluturimi u rikthye menjëherë në aeroportin e Selanikut pasi një dritare pasagjeri u zhvendos gjatë fluturimit. Kompania njoftoi se ulja u krye normalisht dhe udhëtarët u transferuan drejt Gjermanisë disa orë më vonë me një avion zëvendësues. Ndërkohë, Autoritetet e Sigurisë Ajrore Greke kanë nisur një hetim zyrtar për të zbardhur shkaqet e kësaj ngjarjeje, teksa ekspertët e aviacionit nënvizuan se mbajtja e rripit të sigurimit nga pasagjeri ishte elementi vendimtar që parandaloi një tragjedi me përmasa fatale.