Një moment i pazakontë ndodhi gjatë gjysmëfinales së Kupës së Botës mes Francës dhe Marokut, kur regjisorët e transmetimit ndërkombëtar u përqendruan aq shumë te Shakira, saqë humbën disa sekonda të aksionit në fushë.

Këngëtarja kolumbiane ishte e pranishme në tribunat VIP të stadiumit në Boston, ku ndoqi nga afër sfidën e fituar 2-0 nga Franca ndaj Marokut.

Shakira u shfaq në ekran pak pas minutës së 40-të, gjatë një ndërprerjeje të lojës. Megjithatë, edhe pasi arbitri rifilloi ndeshjen, kamerat vijuan të fokusoheshin te artistja, duke lënë jashtë transmetimit disa momente të aksionit.

Në Shtetet e Bashkuara, sfida transmetohej nga Fox, transmetuesi zyrtar i Kupës së Botës. Komentatori John Strong e vuri menjëherë në dukje situatën.

“Loja ka rifilluar. Brahim Diaz pati një mundësi për të avancuar, por Jules Kounde e ndali”, tha ai, përpara se të shtonte: “Duket se drejtuesit e transmetimit ndërkombëtar nuk e kuptuan menjëherë se topi ishte ende në lojë.”

Incidenti u komentua gjerësisht edhe në rrjetet sociale, ku shumë tifozë kritikuan regjisorët e transmetimit për humbjen e aksionit, ndërsa të tjerë e panë situatën me humor.

Shakira pritet të jetë sërish në qendër të vëmendjes në finalen e Kupës së Botës, pasi është konfirmuar si një nga artistët që do të performojnë në spektaklin e pjesës së pushimit më 19 korrik në East Rutherford, New Jersey.

Artistja 49-vjeçare ndodhet aktualisht në turne në Amerikën e Veriut, me koncerte në Boston, New York dhe New Jersey, të planifikuara para dhe pas performancës së saj në finalen e Botërorit.