Një vajzë 17-vjeçare ka humbur jetën gjatë festimeve pas fitores së Francës ndaj Marokut në çerekfinalet e Kupës së Botës 2026.

Sipas shërbimeve të emergjencës franceze, ngjarja e rëndë ndodhi më 10 korrik në Aulnoye-Aymeries, pranë qytetit Maubeuge, në veri të Francës, afër kufirit me Belgjikën.

Mësohet se e reja ndodhej në pjesën e pasme të një kamioni, i cili po tërhiqte një rimorkio, kur ka rënë nga automjeti dhe është përplasur nga vetë kamioni, duke ndërruar jetë në vendngjarje.

Drejtuesi i mjetit është ndaluar nga policia, ndërsa autoritetet kanë nisur hetimet për të zbardhur plotësisht rrethanat e aksidentit. Një tjetër adoleshent, dëshmitar i ngjarjes, është transportuar në spital për shkak të tronditjes psikologjike.

Pas fitores 2-0 të Francës ndaj Marokut në Boston, mijëra tifozë dolën në rrugë në qytete të ndryshme të vendit për të festuar suksesin e kombëtares. Në Paris, turma të mëdha u mblodhën në hapësirat publike, ndërsa autoritetet kishin angazhuar forca të shumta policie për garantimin e sigurisë.

Një prej këtyre festimeve, megjithatë, përfundoi në një tragjedi me humbjen e jetës së 17-vjeçares.