Administrata e presidentit amerikan Donald Trump ka publikuar një seri dokumentesh të deklasifikuara mbi fenomenet ajrore të paidentifikuara (UAP), duke hedhur dritë mbi disa prej rasteve më të diskutuara të hetuara ndër vite nga ushtria amerikane dhe agjenci të tjera qeveritare.

Paketa e re e dokumenteve, e publikuar në faqen zyrtare të Departamentit të Mbrojtjes, përfshin raporte, fotografi dhe materiale video që lidhen me incidente të ndryshme të mbetura të pashpjeguara. Në njoftimin shoqërues thuhet se qytetarët amerikanë duhet të kenë mundësi t’i shohin vetë këto materiale.

Ndër dokumentet më të rëndësishme përfshihen pamje të objekteve me forma të pazakonta, mes tyre një objekt me tetë cepa i regjistruar mbi Azinë Lindore, një fenomen që ngjan me një “kandil deti” mbi Oqeanin Atlantik dhe një tjetër objekt që lëviz në trajektore zigzage mbi pjesën perëndimore të Shteteve të Bashkuara.

Një prej rasteve më të detajuara lidhet me uzinën bërthamore Pantex në Teksas. Sipas një raporti të Departamentit të Energjisë, në vitin 2015 radarët zbuluan një objekt të paidentifikuar pranë kompleksit me siguri të lartë. Objekti, i përshkruar si në formë diamanti dhe pa sistem të dukshëm shtytës, u raportua se fluturonte në lartësi të ulët përpara se të zhdukej.

Pamjet dhe të dhënat e mbledhura u analizuan nga Laboratorët Kombëtarë Sandia, ndërsa materialet iu dorëzuan për shqyrtim edhe FBI-së.

Në dosje përfshihet gjithashtu raporti i njohur COMETA, një studim i hartuar nga ish-gjeneralë francezë dhe ekspertë të mbrojtjes, i cili trajton disa raste të pazakonta të fenomeneve ajrore dhe sugjeron se disa prej tyre kërkojnë hetim të mëtejshëm në kuadër të sigurisë kombëtare.

Një tjetër material i publikuar është një video e regjistruar nga Komanda Indo-Paqësore e SHBA-së, ku shfaqet një objekt me pamje të ngjashme me një formë me shumë cepa, duke qëndruar pezull mbi Detin e Verdhë. Pamjet infra të kuqe, të regjistruara në vitin 2025, përmbajnë edhe pjesë të redaktuara për arsye sigurie.

Gjithashtu është publikuar një video e vitit 2020, ku shfaqet një objekt i errët me pamje të ngjashme me një “kandil deti”. Sipas të dhënave të raportit, objekti dukej sikur lëvizte me erën, pa ndryshime të dukshme drejtimi apo manovra të shpejta.

Dosjet përfshijnë edhe materiale historike, mes tyre dokumente nga viti 1949 mbi të ashtuquajturat “topa zjarri të gjelbër” të raportuar mbi Nju Meksiko. Gjatë një takimi sekret në Los Alamos, shkencëtarë dhe zyrtarë ushtarakë diskutuan mbi fenomene që nuk përputheshin me karakteristikat e meteorëve të zakonshëm.

Në publikim përfshihen edhe dokumente nga Projekti Sign i vitit 1948, një nga hetimet e para zyrtare të Forcave Ajrore amerikane mbi raportimet për “disqe fluturuese”. Pas analizimit të dhjetëra rasteve, hetuesit evidentuan ngjashmëri në përshkrimet e objekteve, të cilat raportohej se mund të qëndronin pezull, të përshpejtonin me shpejtësi të lartë dhe të lëviznin pa prodhuar zhurmë.

Departamenti i Mbrojtjes ka theksuar se publikimi i këtyre materialeve nuk përbën një konfirmim zyrtar për origjinën apo identitetin e objekteve të regjistruara, por synon të rrisë transparencën mbi fenomenet ajrore të paidentifikuara.

Sekretari i Mbrojtjes, Pete Hegseth, deklaroi se publikimi i dosjeve është pjesë e angazhimit për transparencë mbi informacionet e qeverisë amerikane lidhur me UAP-të.