Laç, 10 korrik 2026 – Policia vijon hetimet për vrasjen e Ilir Gjinit, i njohur edhe me mbiemrat Lika, Kokaj dhe Nure, rreth 40 vjeç, i cili u qëllua me armë zjarri mbrëmjen e së enjtes në Laç.

Sipas Policisë, 40-vjeçari humbi jetën gjatë transportimit drejt spitalit si pasojë e plagëve të marra. Për ngjarjen është shpallur në kërkim Emiljan Suti, i njohur edhe me emrin Artur Suti, i dyshuar si autor i vrasjes.

Nga të dhënat paraprake hetimore rezulton se viktima dhe i dyshuari kishin pasur një konflikt rreth një muaj më parë në qendër të qytetit. Dyshohet se ata janë përballur sërish mbrëmjen e ngjarjes, pak para se të ndodhte atentati.

Sipas burimeve hetimore, të dy banonin në të njëjtën lagje. Viktima ishte duke hyrë në pallatin ku banonte, pasi kishte parkuar automjetin, kur u qëllua me disa plumba.

Policia ka shoqëruar për t’u marrë në pyetje nënën dhe vëllain e personit të shpallur në kërkim, ndërsa kontrollet për lokalizimin dhe arrestimin e tij vijojnë.

Në vendin e ngjarjes, grupi hetimor ka sekuestruar një armë zjarri pistoletë, e cila dyshohet se i përkiste viktimës. Hetuesit po verifikojnë pistën se Ilir Gjini mund të ketë qenë i armatosur në momentin e ngjarjes, një rrethanë që pritet të sqarohet përmes administrimit të pamjeve të kamerave të sigurisë, provave materiale dhe dëshmive të mbledhura.

Ngjarja ka rënduar më tej situatën e familjes së viktimës, pasi, sipas burimeve, disa muaj më parë ai kishte humbur edhe bashkëshorten. Familjarët kanë hapur sot dyert e mortit për të pritur ngushëllimet dhe për t’i dhënë lamtumirën e fundit 40-vjeçarit.

Hetimet për zbardhjen e plotë të rrethanave dhe motiveve të krimit vijojnë.