Tiranë, 10 korrik 2026 – Shoqata e Restoranteve dhe Bujtinave Shqiptare ka prezantuar një nismë kombëtare që synon ta kthejë mikpritjen tradicionale shqiptare në një standard të turizmit, duke u ofruar turistëve bukë, ujë dhe, sipas mundësive, vaj ulliri falas në restorante dhe bujtina.

Nisma u prezantua në Piqeras të Himarës dhe synon të shtrihet në të gjithë vendin, me qëllim promovimin e traditës shqiptare të mikpritjes dhe forcimin e imazhit të Shqipërisë si një destinacion turistik mikpritës.

Kryetari i Shoqatës së Restoranteve dhe Bujtinave Shqiptare, Kujtim Dervishi, deklaroi se iniciativa nuk krijon një traditë të re, por synon të rikthejë zakonin e hershëm shqiptar të pritjes së miqve me bujari, në mënyrë që çdo vizitor të ndihet i mirëpritur si në një shtëpi shqiptare.

Sipas nismës, bizneset pjesëmarrëse do të shërbejnë falas në çdo tryezë bukë, një gotë ujë dhe, kur të jetë e mundur, vaj ulliri shqiptar, si një gjest simbolik i mikpritjes.

Prefekti i Qarkut Tiranë, Shkëlqim Hajdari, e cilësoi iniciativën një kontribut të rëndësishëm në promovimin e vendit dhe u bëri thirrje restoranteve, bujtinave dhe bizneseve të shërbimit që t’i bashkohen kësaj nisme për të përforcuar identitetin mikpritës të Shqipërisë.

Edhe kryetari i Bashkisë Himarë, Vangjel Tavo, vlerësoi rëndësinë e projektit, duke theksuar se cilësia e shërbimit, mikpritja dhe ruajtja e traditave janë elementë kyç për suksesin afatgjatë të turizmit shqiptar.

Aktiviteti u zhvillua në një bujtinë në jug. Në përfundim të ceremonisë u shpërndanë certifikata mirënjohjeje dhe medalje për kontributin në promovimin e mikpritjes tradicionale dhe zhvillimin e turizmit.