Paralajmërimi i Ambasadës Amerikane / Prindërit që përdorin vizat turistike për të lindur në SHBA mund t’u refuzohet rinovimi

TIRANË, 10 Korrik 2026 – Ambasada e Shteteve të Bashkuara të Amerikës në Tiranë ka lëshuar një paralajmërim të rëndësishëm për të gjithë qytetarët shqiptarë, të cilët shfrytëzojnë vizat turistike (B1/B2) për të udhëtuar drejt SHBA-së me qëllim lindjen e fëmijëve.

Sipas njoftimit zyrtar, autoritetet diplomatike vënë në dukje se një pjesë e prindërve shqiptarë që ndërmarrin këto udhëtime, shpesh i drejtohen programeve publike shtetërore amerikane, si "Medicaid", për të mbuluar kostot e larta të kujdesit shëndetësor dhe lindjes.

Për pasojë, këto shpenzime mjekësore përfundojnë duke u paguar nga taksapaguesit amerikanë, gjë që bie ndesh me rregullat e vizave të përkohshme.

Për këtë arsye, përfaqësia diplomatike bën me dije se prindërit që konstatohen se kanë përdorur fondet publike në SHBA gjatë lindjes, rrezikojnë të mos kualifikohen dhe t’u refuzohet rinovimi i vizës turistike në të ardhmen.

Në mesazhin e saj, Ambasada e SHBA-së rithekson se viza turistike nuk mund të përdoret për qëllime që devijojnë nga arsyeja e udhëtimit e deklaruar gjatë intervistës konsullore dhe aplikimit fillestar.

Përfitimi i paligjshëm nga skemat sociale apo përpjekjet për të anashkaluar rregullat strikte të emigracionit amerikan do të kenë ndikim penalizues të drejtpërdrejtë në vendimet e ardhshme të zyrtarëve konsullorë për pajisjen e këtyre shtetasve me viza të reja.