FIER, 10 Korrik 2026 – Gjykata e Shkallës së Parë e Juridiksionit të Përgjithshëm Fier ka ndryshuar masat e sigurisë për tri vajzat e përfshira në dhunimin e një 17-vjeçareje, ngjarje kjo që shkaktoi reagime të shumta në opinionin publik.

Pas vlerësimit të provave dhe ecurisë së hetimeve, trupi gjykues ka vendosur masën e sigurisë “Arrest në burg” për njërën prej të dyshuarave, një vajzë e moshës 19-vjeçare, e cila do të qëndrojë në qeli deri në përfundim të plotë të hetimeve. Për sa i përket të dyshuarës tjetër, një e mitur e moshës 15-vjeçare, gjykata caktoi masën e sigurisë “Arrest në shtëpi”.

Ndërkohë, për të miturën e tretë të përfshirë në këtë ngjarje, gjykata ka vendosur masën e mjekimit të detyruar. Ky vendim erdhi pasi nga verifikimet dhe ekspertizat e kryera gjatë fazës hetimore rezultoi se ajo shfaqte probleme të shëndetit mendor, ku përveç dhunës ndaj bashkëmoshatares, ishte dokumentuar edhe një konflikt ku ajo kishte dhunuar nënën e saj.

Ky procedim penal nisi pas publikimit të pamjeve filmike në rrjetet sociale, ku shfaqej dhuna barbare ndaj 17-vjeçares. Sipas dëshmive të familjarëve, viktima u dërgua fillimisht në Urgjencën e Spitalit Rajonal të Fierit me hematoma dhe shenja të rënda dhune në trup. Familja e të dëmtuarës ka ngritur gjithashtu pretendime ndaj bluzave të bardha, duke argumentuar se institucioni shëndetësor ka neglizhuar detyrimin ligjor për të njoftuar menjëherë organet e policisë pas konstatimit të shenjave të dhunës.