TIRANË, 10 Korrik 2026 – Gjykata e Posaçme kundër Korrupsionit dhe Krimit të Organizuar (GJKKO) ka shpallur vendimin fajtor për pesë anëtarë të rrjeteve kriminale të përfshirë në dosjen e njohur si "Revanshi", duke i dënuar ata në total me 31 vite e 4 muaj burgim. Të pandehurit përfituan nga mekanizmi i gjykimit të shkurtuar, çka solli uljen e masës fillestare të dënimit me një të tretën.

Sipas vendimit të gjykatës, masat e dënimit të konvertuara janë si më poshtë:

Armando Ndreca – u dënua përfundimisht me 7 vite e 4 muaj burg (nga 11 vite dënim fillestar).

Adrian Pikli (ish-efektivi i forcave speciale RENEA) – u dënua përfundimisht me 6 vite e 8 muaj burg (nga 10 vite dënim fillestar).

Devis Bajramaj – u dënua përfundimisht me 6 vite e 8 muaj burg (nga 10 vite dënim fillestar).

Elvis Ndreca (djali i xhaxhait të ish-deputetit E. Ndreca) – u dënua përfundimisht me 5 vite e 4 muaj burg (nga 8 vite dënim fillestar).

Edison Muceku – u dënua përfundimisht me 5 vite e 4 muaj burg (nga 8 vite dënim fillestar).

Sipas hetimeve të thelluara të SPAK, struktura e posaçme provoi fajësinë e të dënuarve për një sërë veprash të rënda penale, përfshirë sigurimin e mjeteve për kryerjen e vrasjeve, tregtinë e paligjshme të armëve të zjarrit e municioneve, kultivimin e bimëve narkotike dhe pjesëmarrjen në grup të strukturuar kriminal.

Në dosjen hetimore dokumentohet se gjatë vitit 2020, të pandehurit kanë pasur role specifike në sigurimin e kushteve për atentate ndaj eksponentëve të krimit, si Durim Bami, Ervin Kodra dhe Hamza Terziu. Gjithashtu, Armando Ndreca u provua si financues dhe organizator i një rrjeti që prodhoi dhe shiti 243 kilogramë kanabis në Lezhë, ndërsa ish-efektivi Pikli dhe Bajramaj kryenin shitje armësh për llogari të personave me precedentë penalë.

Operacioni "Revanshi", i finalizuar në maj të vitit 2024, goditi shtatë grupe të strukturuara kriminale që vepronin në aleanca dhe konflikte të hapur mes tyre në zonat e Tiranës, Lezhës dhe Fushë-Krujës, ku u përfshinë emra të njohur të botës së krimit si Ervis Martinaj, Arben Ndoka dhe Durim Bami. Ky procedim çoi në lëshimin e 50 urdhër-arresteve, sekuestrimin e pasurive me vlerë 4.5 milionë euro, si dhe bllokimin e rreth 3 milionë eurove cash të gjetura në banesën e shtetasit Ervis Doçi.