Panik në fluturimin Selanik–Mynih: problem në motor, dëmtohet një dritare në ajër dhe plagoset një pasagjer

Momente frike kanë përjetuar pasagjerët e një fluturimi të Ryanair, i cili ishte nisur mëngjesin e sotëm nga aeroporti “Maqedonia” i Selanikut me destinacion Mynihun.

Sipas të dhënave paraprake, vetëm pak minuta pas ngritjes, ndërsa avioni ndodhej në një lartësi rreth 6.000 deri në 6.500 këmbë, u shfaq një problem teknik në njërin prej dy motorëve.

Ekuipazhi aktivizoi menjëherë procedurat e emergjencës, ndërsa piloti vendosi të kthehej pas në aeroportin e Selanikut. Avioni arriti të ulej në mënyrë të sigurt.

Ndërkohë, pasagjerët kanë treguar se gjatë fluturimit është dëgjuar një zhurmë e fortë dhe një nga dritaret e avionit është dëmtuar, duke shkaktuar dekompresion në kabinë. Për shkak të situatës, maskat e oksigjenit ranë automatikisht, ndërsa disa pasagjerë ndihmuan një person që ndodhej ulur pranë dritares së dëmtuar.

Pas uljes së avionit, një ambulancë e EKAB-it mori pasagjerin e plagosur dhe e transportoi në spitalin AXEPA të Selanikut. I lënduari është një shtetas serb, 61 vjeç, i cili ka pësuar dëmtim në qafë.

Pasagjerët u nisën më vonë drejt Mynihut me një avion tjetër, ndërsa autoritetet përkatëse dhe kompania ajrore kanë nisur hetimet për të përcaktuar shkaqet e incidentit.