WASHINGTON/TEHERAN, 10 korrik 2026 – Izraeli u ka përcjellë Shteteve të Bashkuara informacione të reja të inteligjencës, sipas të cilave Irani po shqyrton një plan për të atentuar ndaj presidentit amerikan Donald Trump. Lajmi është publikuar nga The Wall Street Journal, duke cituar burime të njohura me çështjen.

Sipas raportimit, vlerësimi i inteligjencës izraelite konsiderohet një nga faktorët që kanë kontribuar në rritjen e tensioneve mes Uashingtonit dhe Teheranit. Deri më tani nuk ka pasur një konfirmim publik nga autoritetet amerikane apo iraniane mbi këto pretendime.

Irani ka deklaruar vazhdimisht se synon të hakmerret për vrasjen e gjeneralit Qassem Soleimani, i cili u vra në janar të vitit 2020 në një sulm amerikan me dron, të urdhëruar gjatë mandatit të parë të Donald Trump.

Ndërkohë, sipas zyrtarëve amerikanë të cituar nga CNN, administrata amerikane vijon t’i japë përparësi kanaleve diplomatike për të ulur tensionet dhe për të shmangur një përshkallëzim të mëtejshëm të konfliktit me Iranin. Megjithatë, Shtetet e Bashkuara mbajnë të gatshme edhe opsione ushtarake, nëse zhvillimet në terren e bëjnë të nevojshme.

Burimet bëjnë të ditur se Uashingtoni ka miratuar një strategji që kombinon presionin ushtarak me përpjekjet diplomatike, duke ruajtur një listë objektivash të mundshëm për goditje, ndërsa vijojnë përgatitjet për skenarë të ndryshëm. Sipas zyrtarëve amerikanë, diplomacia mbetet aktualisht alternativa kryesore.

Hormuzi, sërish në qendër të tensioneve

Ndërkohë, trafiku detar në Ngushticën e Hormuzit, një nga rrugët më të rëndësishme për transportin global të naftës, ka rënë ndjeshëm. Sipas raportimeve, numri i anijeve që kalojnë çdo ditë është reduktuar në rreth një të tretën e nivelit të periudhës para konfliktit. Aktualisht, një pjesë e anijeve lundrojnë pranë ujërave iraniane, ndërsa të tjerat ndjekin korridorin detar përgjatë bregdetit të Omanit.

Presidenti amerikan Donald Trump zhvilloi gjithashtu një bisedë telefonike me kryeministrin izraelit Benjamin Netanyahu, gjatë së cilës, sipas raportimeve, u diskutuan operacionet ushtarake amerikane në rajonin e Gjirit Persik.

Nga ana e tij, Netanyahu ka përsëritur shqetësimet për deklaratat e presidentit turk Recep Tayyip Erdoğan, një prej kritikëve më të zëshëm të Izraelit në arenën ndërkombëtare. Zyra e kryeministrit izraelit bëri të ditur se ai ka ritheksuar nevojën për ruajtjen e zonave tampon përgjatë kufijve të Izraelit.

Këto zhvillime vijnë në një kohë kur po regjistrohet përparim në procesin e tërheqjes së forcave izraelite nga disa zona në Libanin jugor, të cilat pritet t’i kalojnë nën kontroll ushtrisë libaneze.