Një grup studentësh të pranishëm në protestën e zhvilluar në Tiranë ka zgjedhur një formë simbolike për të shënuar ditën e 40-të të tubimeve, duke shpërndarë hallvë për pjesëmarrësit.

Sipas tyre, gjesti lidhet me simbolikën e "të 40-tave" dhe përfaqëson, jo një humbje, por "vdekjen e frikës" dhe vendosmërinë për të vijuar protestën.

"Hallva simbolizon fundin e frikës tek ne. Ne do të vazhdojmë të protestojmë deri sa kërkesat tona të dëgjohen", u shprehën disa prej studentëve të pranishëm.

Protesta, e cila ka hyrë në ditën e saj të 40-të, ka mbledhur qindra qytetarë në kryeqytet. Pjesëmarrësit kanë marshuar drejt Kryeministrisë, duke përsëritur kërkesën për dorëheqjen e kryeministrit Edi Rama dhe duke bërë thirrje për ndryshime politike.

Organizatorët kanë deklaruar se tubimet do të vijojnë edhe në ditët në vijim, duke këmbëngulur se protesta do të vazhdojë deri në përmbushjen e kërkesave të tyre.