Qeveria ka miratuar një vendim të ri që përmirëson trajtimin financiar të efektivëve të Shërbimit të Mbrojtjes nga Zjarri dhe Shpëtimin, duke rritur kompensimin për orët shtesë të punës, turnet e natës, si edhe angazhimin gjatë ditëve të pushimit dhe festave zyrtare.

Lajmi u bë i ditur nga Besfort Lamallari, i cili përmes një reagimi publik theksoi se vendimi synon të garantojë një trajtim më të drejtë dhe më motivues për punonjësit e këtij shërbimi.

Sipas Lamallarit, akti i miratuar vendos gjithashtu standarde të qarta për mbrojtjen e efektivëve nga mbingarkesa në punë, duke synuar përmirësimin e kushteve të punës dhe rritjen e motivimit për personelin që përballet çdo ditë me situata emergjente.

Ai e cilësoi vendimin si një hap të rëndësishëm në përmbushjen e angazhimit të qeverisë për të mbështetur dhe forcuar Shërbimin e Mbrojtjes nga Zjarri dhe Shpëtimin.

Sipas tij, efektivët e këtij shërbimi kryejnë një rol jetik në mbrojtjen e jetës dhe pronës së qytetarëve, duke u përballur vazhdimisht me rreziqe dhe situata emergjente, ndaj edhe përmirësimi i trajtimit financiar përbën një vlerësim konkret për punën e tyre.