Presidenti turk, Recep Tayyip Erdogan, ka tërhequr vëmendjen në përfundim të samitit të NATO-s, pasi u dhuroi liderëve të Aleancës revolverë të personalizuar të modelit Gümüşay .357 Magnum, të gdhendur me emrin e secilit prej tyre.

Sipas raportimeve, armët ishin vendosur në kuti druri me flamurin e Turqisë dhe logon e NATO-s, të shoqëruara me një komplet pastrimi dhe municion. Dhurata synonte të promovonte industrinë turke të mbrojtjes, por në disa vende evropiane hasi menjëherë në kufizime ligjore për importin dhe posedimin e armëve të zjarrit.

Një nga rastet më të komentuara ishte ai i kryeministrit belg, Bart De Wever, i cili, sipas Reuters, u informua për përmbajtjen e dhuratës vetëm gjatë udhëtimit të kthimit. Pas mbërritjes në Belgjikë, arma dhe municioni iu dorëzuan policisë së aeroportit dhe u vendosën në ruajtje të sigurt në pritje të procedurave përkatëse.

Ndërkohë, kryeministri britanik Keir Starmer dhe homologu i tij holandez vendosën t’i linin revolverët pranë përfaqësive diplomatike të vendeve të tyre në Turqi. Sipas raportimeve, armët do t’i nënshtrohen çaktivizimit përpara çdo transporti, në përputhje me legjislacionin kombëtar.

Edhe institucionet e Bashkimit Evropian ndoqën procedurat përkatëse. Presidentja e Komisionit Evropian, Ursula von der Leyen, pritet ta mbajë revolverin në një ambient të kontrolluar dhe më pas ta çaktivizojë për ta dhuruar në një muze ushtarak. Ndërsa për Presidentin e Këshillit Evropian, Antonio Costa, u zbatua procedura standarde e regjistrimit të dhuratës, pasi vlera e saj tejkalon kufirin e lejuar për dhuratat personale të zyrtarëve evropianë.

Sipas Reuters, gjesti i Erdoganit është interpretuar si një përpjekje për të promovuar industrinë turke të prodhimit të armëve. Megjithatë, ai ka nxitur diskutime mbi protokollet diplomatike dhe trajtimin e armëve të zjarrit si dhurata zyrtare.