Një rast i dhunës në familje është raportuar në fshatin Lipovec të Gjakovës, ku një 17-vjeçar dyshohet se ka ushtruar dhunë fizike ndaj nënës së tij pas një konflikti për disa vegla pune.

Sipas informacioneve paraprake, ngjarja ka ndodhur në orët e para të mëngjesit të 7 korrikut, rreth orës 06:00. Viktima, një 45-vjeçare me inicialet S.A., ka deklaruar se djali i saj kishte marrë një set veglash pune nga banesa me qëllim për t’i shitur, ndërsa ajo ishte përpjekur ta ndalonte.

Gjatë konfliktit, i mituri dyshohet se e ka goditur me grusht në stomak dhe më pas është larguar nga banesa duke marrë me vete veglat e punës.

Sipas dëshmisë së 45-vjeçares, nuk ishte hera e parë që djali tentonte të shiste sende nga shtëpia.

Megjithëse u godit, gruaja nuk ka pësuar lëndime të dukshme dhe ka refuzuar trajtimin mjekësor. Ajo u ka deklaruar autoriteteve se nuk ndihet e rrezikuar dhe nuk ka kërkuar urdhër mbrojtjeje apo strehim.

Rasti është proceduar nga autoritetet, të cilat po vijojnë veprimet hetimore për zbardhjen e plotë të ngjarjes.