Një e afërme e familjes Ziçi ka reaguar pas ngjarjes së rëndë të ndodhur në Shkodër, ku 55-vjeçarja Bardhe Ziçi humbi jetën, ndërsa bashkëshorti i saj, Shtjefën Ziçi, dyshohet si autor i krimit.

Në një prononcim për mediat, Zoje Nika e përshkroi lajmin si një tronditje për të afërmit dhe banorët e lagjes, duke theksuar se çifti njihej si njerëz të qetë, të respektuar dhe pa probleme në familje.

"Kurrë nuk kemi parë diçka të keqe prej tij. Ka qenë njeri i mirë dhe i ndershëm. Edhe gruaja ishte shumë e respektuar, nuk besoj se ka njeri në këtë lagje që mund të thotë një fjalë të keqe për të," u shpreh ajo.

Sipas Nikës, mes bashkëshortëve nuk kishte pasur konflikte të njohura, ndërsa shtoi se e kishte vizituar shpesh familjen.

"Debate nuk kanë pasur kurrë. Kam qenë shpesh në shtëpinë e tyre dhe gjithmonë i kam parë duke jetuar në harmoni. Na erdhi shumë keq për këtë familje, sidomos për fëmijët," tha ajo.

Dëshmia e të afërmes bie në kontrast me ngjarjen tragjike që tronditi Shkodrën, ndërsa policia vijon hetimet për të zbardhur plotësisht rrethanat dhe motivet e vrasjes.