KORÇË – Detaje të reja kanë dalë në dritë nga ngjarja e rëndë e regjistruar mesditën e sotme në qytetin e Korçës, ku një person mbeti i plagosur rëndë pas një konflikti me armë të ftohta. Ngjarja ka ndodhur specifikisht në afërsi të shkollës “Demokracia”.

Burime zyrtare bëjnë me dije se i dëmtuari nga ky konflikt është shtetasi Rigels Janaqi. Ai ka marrë dëmtime të rënda në zonën e qafës dhe është transportuar me urgjencë në Spitalin Rajonal të Korçës, ku po merr ndihmën e nevojshme mjekësore nga bluzat e bardha.

Arrestohet autori

Policia ka reaguar menjëherë duke bërë të mundur identifikimin dhe kapjen në kohë rekord të autorit të dyshuar të sulmit. Ai është shtetasi Gëzim Ramka.

Nga të dhënat e para hetimore, rezulton se shtetasi Gëzim Ramka vuan nga probleme të shëndetit mendor. Ai është shoqëruar në mjediset e komisariatit vendor të policisë, ku po kryhen veprimet e mëtejshme procedurale.

Grupi hetimor ndodhet në vendngjarje dhe po punon intensivisht për sqarimin e plotë të rrethanave dhe shkaqeve që çuan në këtë konflikt të përgjakshëm.