TIRANË – Pavarësisht se qershori përkon me kulmin e prodhimit bujqësor në vend, çmimet e perimeve kanë shënuar një rritje të ndjeshme, duke rënduar më tej buxhetet e familjeve shqiptare.

Sipas të dhënave të publikuara nga INSTAT, grupi “Perime, zarzavate dhe bishtajore” u shtrenjtua me 8.5% në muajin qershor, krahasuar me të njëjtën periudhë të një viti më parë. Kjo rritje është pothuajse trefish më e lartë se inflacioni mesatar i ushqimeve, i cili rezultoi 3%.

Rritja e çmimeve konsiderohet e pazakontë, pasi gjatë kësaj periudhe oferta e prodhimeve vendase është zakonisht në nivelet më të larta, çka në kushte normale do të duhej të sillte ulje të çmimeve në treg. Megjithatë, tregu i pakicës ka ndjekur një prirje të kundërt.

Ekspertët e lidhin këtë zhvillim me disa faktorë, mes të cilëve rritja e kostove të prodhimit dhe transportit, kërkesa më e lartë gjatë sezonit turistik, si edhe orientimi i një pjese të prodhimit drejt eksporteve, ku çmimet janë më konkurruese.

Sipas statistikave, rritjen më të lartë mes produkteve ushqimore e shënuan peshku dhe produktet e detit me 9%, të ndjekura nga perimet me 8.5%. Ndërkohë, çmimet e mishit u rritën me 4.2%, produktet e bulmetit dhe vezët me 2.4%, sheqeri dhe ëmbëlsirat me 2.5%, ndërsa vajrat dhe yndyrat me 1.7%. Rritja më e ulët u regjistrua te drithërat dhe produktet me bazë drithërash, me 0.9%.

Në të kundërt, frutat ishin i vetmi grup ushqimor që shënoi ulje të çmimeve, me 2.8% krahasuar me një vit më parë.

Rritja e çmimeve të perimeve vjen në një periudhë kur konsumi shtohet ndjeshëm për shkak të sezonit turistik, me kërkesë të lartë nga hotelet, restorantet dhe njësitë e shërbimit, veçanërisht në zonat bregdetare. Paralelisht, eksportet dhe kostot më të larta të prodhimit kanë ndikuar në kufizimin e ofertës për tregun vendas, duke mbajtur çmimet në nivele të larta edhe gjatë sezonit të bollshëm bujqësor.